ಜಾಣಮೂರ್ಖ

ಆನಂದಮಯ ಈ ಜಗ ಹೃದಯ

ಬಣ್ಣ ಗಾಜಲಿ ನೋಡ

ಲೆಲ್ಲವದೆ ಬಣ್ಣ ಕಾಣ್

ಅಂತೆ ಸತ್ಯಕೆ ಮಿಥ್ಯ

ದಾ ಬಣ್ಣವಯ್ಯೋ !

ಗಾಜಿಗಂಟಿದ ಬಣ್ಣ

ಕಳೆದಾಗಲಲ್ಲೆ ನಿಜ

ವೇದ್ಯವೈ ಸತ್ಯಾರ್ಥ

ಜಾಣಮೂರ್ಖ //

ಬಣ್ಣದ ಗಾಜಿನಲ್ಲಿ  ಭೌತಿಕ ಜಗತ್ತನ್ನು ನೋಡಿದರೆ ಗಾಜು ಯಾವ ಬಣ್ಣದಲ್ಲಿರುತ್ತದೋ ಜಗತ್ತೂ ಅದೇ ಬಣ್ಣದಲ್ಲಿಯೇ ಕಾಣುತ್ತದೆ. ಹಾಗೆಯೇ ಗಾಜಿನ ಬಣ್ಣವನ್ನು ಕಳೆದು ನೋಡಿದರೆ  ಆ ವಸ್ತುವಿನ ನಿಜಸ್ಥಿತಿ ತಿಳಿಯುತ್ತದೆ. ಅಲ್ಲವೇ !? ಹಾಗೆಯೇ ಈ ಬದುಕಿನಲ್ಲಿ ಸತ್ಯಕ್ಕೆ ಮಿಥ್ಯದ ಮುಸುಕಿದೆ ! ಮನಸ್ಸಿಗೆ ಮಾಯೆಯ ಮುಸುಕಿದೆ ! ಅವು  ಗಾಜಿನ ಬಣ್ಣದಂತೆ ಜಗದ ಸತ್ಯದ ನೈಜತೆಯನ್ನು ಅರಿಯಲು ಬಿಡುವುದಿಲ್ಲ. ಅದಕ್ಕೆ ಜ್ಞಾನಿಗಳು, ಪ್ರಾಜ್ಞರು ಗಾಜಿನ ಬಣ್ಣವನ್ನು ಮೊದಲು ಕಳೆದು ಸತ್ಯದ ನೈಜತೆಯನ್ನೇ ನೋಡಿ ಆನಂದಿಸುತ್ತಾರೆ. ಮಿಥ್ಯ ಮತ್ತು ಮಾಯೆಯ ಬಣ್ಣವನ್ನು ಕಳೆದು ನೋಡಿದಾಗ ಬದುಕಿನ ವಾಸ್ತವ ಸತ್ಯವು ಗೋಚರಿಸುತ್ತದೆ. ಆ ನಂತರವೇ ಆನಂದಮಯ ಈ ಜಗ ಹೃದಯ ! ಮತ್ತೆ ಭಯ , ಚಿಂತೆ ದುಃಖ ಉದ್ವೇಗಾದಿಗಳಿಗೆಲ್ಲ ಜಾಗವೆಲ್ಲಿ ? ಅಲ್ಲವೇ ಗೆಳೆಯರೇ ? 

- ಮುರಳೀಧರ ಹೆಚ್.ಆರ್.